PM Kisan Namo Shetkari 4000 Rupees | सध्या ग्रामीण भागात फक्त एकाच गोष्टीची चर्चा आहे, ती म्हणजे जिल्हा परिषद आणि पंचायत समितीच्या निवडणुका. ५ फेब्रुवारीला मतदानाचा बिगुल वाजणार असल्यामुळे गावगाड्याचं राजकारण चांगलंच तापलंय. पण या राजकीय धामधुमीत शेतकरी राजा मात्र एका वेगळ्याच प्रतीक्षेत आहे “नमो शेतकरी योजनेचा रखडलेला हप्ता कधी येणार?”
गेल्या दोन-अडीच महिन्यांपासून नमो शेतकरी योजनेचा हप्ता लांबणीवर पडल्याने शेतकऱ्यांमध्ये संभ्रम निर्माण झाला आहे. अनेकांना वाटतंय की ही योजना बंद तर झाली नाही ना? पण तसं मुळीच नाही. उलट, आता निवडणुकांच्या तोंडावर सरकार मोठी खेळी खेळण्याच्या तयारीत असल्याची चर्चा आहे.
हप्ता का रखडला? आणि आता एकत्र मिळणार का?
नमो शेतकरी महासन्मान निधीचा हप्ता तांत्रिक कारणांमुळे आणि काही प्रमाणात प्रशासकीय नियोजनामुळे रखडला होता. मात्र, आता फेब्रुवारीच्या पहिल्या आठवड्यात निवडणुका आहेत. राजकारणात ‘लाभार्थी’ हा शब्द सध्या परवलीचा झाला आहे. त्यामुळेच, शेतकरी मतदारांना दिलासा देण्यासाठी आणि त्यांचा विश्वास जिंकण्यासाठी पीएम किसानचे २ हजार आणि नमो शेतकरी योजनेचे २ हजार, असे एकूण ४ हजार रुपये एकाच वेळी खात्यात जमा होण्याची दाट शक्यता वर्तवली जात आहे.
आचारसंहितेचा अडथळा येणार का?
अनेक शेतकऱ्यांच्या मनात भीती आहे की निवडणुका जाहीर झाल्यामुळे ‘आचारसंहिता’ आडवी येईल का? पण जाणकारांच्या मते, ज्या योजना आधीपासून सुरू आहेत किंवा ज्यांचे लाभार्थी आधीच निश्चित झाले आहेत, अशा चालू योजनांचा निधी वाटप करण्यास आचारसंहितेचा फारसा फटका बसत नाही. केवळ नवीन घोषणा करता येत नाहीत. त्यामुळे, शेतकऱ्यांच्या हक्काचे पैसे मिळण्याचा मार्ग मोकळा आहे.
शेतकरी दादा, जरा लक्ष द्या…
खतं, बियाणं आणि घरखर्चासाठी पैशांची ओढत असताना, हे ४ हजार रुपये शेतकऱ्यांसाठी मोठा आधार ठरणार आहेत. सरकारकडून लवकरच याबाबतची अधिकृत घोषणा किंवा ‘बटण दाबून’ निधी वितरणाचा कार्यक्रम पार पडू शकतो.
नुसत्या गप्पांवर विश्वास न ठेवता, आपल्या अर्जाची स्थिती (Status) तपासून ठेवा आणि केवायसी (e-KYC) पूर्ण असल्याची खात्री करून घ्या. कारण, जेव्हा लक्ष्मी दारात येईल, तेव्हा तांत्रिक कारणांमुळे तुमची संधी हुकायला नको.